Hinaing ng ding-ding at kisame
Dati’y kay saya lagi ng iyong tinig
Walang ginagawa kundi ang umawit
Sa bawat pagkumpas may saya itong hatid
Dulot kaya ito ng pusong umiibig?
Paggising sa umaga aking naririnig
Papuring mga awit iyung sinasambit
Walang pakialam malimutan man ang titik
Ang mahalaga makapagpuri at makaawit.
Ngunit ilang gabi ng aming naririnig
Impit na iyak sa unan ay sinisiksik
Iyak na me takot, hapdi at sakit
Kadahilanan nito’y di namin mabatid.
Wala ng mga awit, tinig ay di na marinig
Papuring dating sinasambit napalitan ng pait
Mga halakahak mo’y bihira na ring marinig
Nakabibinging katahimikan iyon ang kapalit.
