Paano Maibabalik ang Nakaraan
aDi ko na lam kung paano sisimulan ang ating kwentuhan
Sa pagdidikit ba ng mga nabasag na nakaraan
O sa pagtatagni-tagni ng napunit na samahan
O baka naman mabuting kalimutan na lamang?
Kung aking babalikan ang ating nakaraan
Kay saya saya nito tila walang katapusan
Laging magkasama saan mang lakaran
Di mapaghiwalay ng kahit ninuman.
Dumating ang panahon tayo’y nagtampuhan
Hindi nag-usap ng kung ilang buwan
Sama ng loob kinimkim hindi pinag usapan
Humantong sa isang matinding kumprontahan.
Ngayon tayo’y ok na naman
Pero bakit ganun hindi ko malaman
Parang may kulang na sa ating pagkakaibigan
Bakit parang kay hirap ibalik ng nakaraan?
Paano maibabalik ang dating samahan?
Kailangan bang ito’y muling pag usapan?
Parang kay layo mo na at di na maabutan?
Paano ko maibabalik ang ating nakaraan?
